Þolinmæði sr. Svavars Alfreðs

Ef ég væri með hatt myndi ég taka ofan fyrir sr. Svavari Alfreð Jónssyni. Það virðist vera samdóma álit ýmissa herramanna að athugasemdakerfi bloggs sérans sé ágætis völlur til skotæfinga í orðaformi, og virðist þar skipta litlu máli hvað Svavar lætur út úr sér. Ef presturinn myndi voga sér að staðhæfa að honum þætti t.a.m. kaffi ágætt, yrði hann blammaður niður á stundinni; einn myndi neita að taka þessa staðhæfingu gilda þar til Svavar kæmi til skýringar og sönnunar með tölur um kaffineyslu sína síðustu árin, annar myndi ásaka hann um tillitsleysi við þá sem þykir te betra, sá þriðji biðja Svavar að útskýra þessa kaffidrykkju sína í ljósi þekktra neikvæðra áhrifa kaffis á líkamann, og sá fjórði myndi láta ljós sitt skína með einhverri smellinni athugasemd um gáfnafar kaffidrykkjumanna. Ef Svavar kæmi ekki með umbeðin rök, sannanir og skífurit máli sínu til stuðnings yrði hann ásakaður um hugleysi og almennan aumingjaskap; “svona eruði allir, þessir kaffidrykkjumenn!”.

Þrátt fyrir þessa skotglöðu pörupilta bloggar Svavar enn. Hvaðan kemur honum þolinmæðin? Það væri gaman að vita. Ég er kannski ekki sammála honum í öllu, en fyrir geysilegri þolinmæði hans ber ég tvímælalaust gífurlega virðingu. Áfram Svavar!

=Þ. 

Athugasemdir

[DoctorE (IP-tala skráð) 22.2.2008 kl. 09:19]

Hann vinnur sem prestur, hann er að verja djobbið sitt sem hann veit að verður ekki til mikið lengur eða a.m.k. verður að fækka prestum mjög því aukin menntun er ávísun á trúfrelsi.

Þú verður bara að lesa þína biblíu og kynna þér þessi mál vel til þess að sjá að þetta er far out, til þess að sjá að þjóðkirkja stenst ekki mannréttindi, til þess að sjá að hinn kristni guð er bæði algerlega ótrúverðugur og alls ekki sá góði guð sem fólk ímyndar sér.

Peace

[Jakob (IP-tala skráð) 22.2.2008 kl. 13:40]

Mér sýnist þú vera einu kommenti nær því að verða hin nýja sr. Þóra Alfreðs?

[Magnús Geir Guðmundsson, 22.2.2008 kl. 13:49]

Góð færsla um ágætan mann!

[Hulda (IP-tala skráð) 23.2.2008 kl. 01:27]

Ég þekki manninn bæði sem prest og sem fjölskyldumann, bæði ágætir karakterar en þolinmæðin er bara Svavar, hann á voða erfitt með að æsa sig.  Þetta með skotvöllinn er náttúrulega það að hann er prestur, og prestar eru upp að ákveðnu marki litnir hornauga þessa daganna.  En það verður þú ekki. Þú verður uppreysnarpresturinn Þóra! :D

[Valborg (IP-tala skráð) 25.2.2008 kl. 21:46]

Mikið sammála þessu!!!